Japondyq «NHK» teleradıokompanııasy óz kórermenderine Qazaqstan jáne «Astana Ekspo-2017» halyqaralyq kórmesi jaıynda 110 mınýttyq baǵdarlama taratty.
Arnaıy jobanyń avtory, tanymal japondyq jýrnalıst – Okoshı Kensýke. Osy jyldyń shilde aıynda Qazaqstanǵa japon telearnasynyń túsirilim toby kelip, elimizdiń – Atyraý, Qaraǵandy, Semeı, Aqtaý, Almaty jáne t.b oblystaryna issaparmen baryp qaıtqan bolatyn.
Atalmysh jobada japondyq áriptester memleketimizdiń damýy jaıynda, qazaqstandyqtardyń turmys-tirshiligin, mádenıeti men salt-dástúrin keńinen kórsetti. Japon jýrnalısteriniń aıtýynsha, bul Qazaqstan jaıly Japon televızııasy tarıhyndaǵy kórsetilgen eń alǵashqy da aýqymdy baǵdarlama.
Sondaı-aq joba aıasynda, baǵdarlamanyń tutastaı bir bóligi «QAZAQSTAN» Respýblıkalyq teleradıokorporasııasynyń qyzmetine arnalǵan, ásirese Ulttyq arnadaǵy ózgeristerdi erekshe atap ótken. Joba jetekshisi Okoshı Kensýke Astanaǵa ózi arnaıy kelip, shyǵarmashylyq toppen birqatar baǵdarlamalardyń túsirilimine qatysyp, Basqarma tóraǵasy Erlan Qarınnen suhbat aldy. Japondyq áriptesterdi teleradıokorporasııanyń jumys barysy, telearnadaǵy ózgerister, biregeı formatta shyqqan jańa da, tyń jobalar tánti etti.
Aıta keteıik, bul bastama «NHK» jáne «QAZAQSTAN» teleradıokorporasııalary arasyndaǵy yntymaqtastyq ornatýdaǵy eń alǵashqy qadam bolmaq.
Sonymen qatar, osy jyldyń qazan aıynda teleradıokorporasııanyń delegasııasy Japonııaǵa issaparǵa barýdy josparlap otyr. Onda, Basqarma tóraǵasy Erlan Qarın «NHK» teleradıokompanııasynyń prezıdenti Rıochı Ýedamen kezdesedi.
Issapar barysynda japondyq áriptestermen qarym-qatynas ornatyp, túsirilim alańdaryna baryp, kontent pen tájirıbe almasý múmkindigin qarastyrady.
Anyqtama: «NHK» Japon teleradıotaratý korporasııasy japondyq jáne álemdik aqparattyq keńistikte jetekshi BAQ-nyń biri bop sanalady. Teleradıokorporasııa quramynda 8 aımaqtyq ortalyq jáne el ishinde habar taratatyn 54 stansııa bar.